Ki Nou
Istwa Mouvman Kreyòl Ayisyen


EMISYON SOLĒY

 

Emisyon Solèy, se non emisyon ki te konn fèt nan Radyo Karayib chak dimanch maten depi 7è fè beng. Nan emisyon sila-a, nou te pibliye rechèch laboratwa Mouvman Kreyòl-la, enfòme piblik-la sou tout aktivite nasyonal e entènasyonal ki gen rapò ak lakilti, kritike -pou ede-tout aktivite teyat  gwoup teyat yo t-ap prezante. Diskite, pale koze, òganize konferans, fè konkou, ankouraje tout mounn ekri, voye dokiman pou piblikasyon. Apre kaye nimewo 1, Kaye nimewo 2 ki defini direksyon travay nou, Mouvman Kreyòl pibliye "Choublak ak Kamelya". Se yon kouwòn  onz sanba te trese ansanm ansanm pou ofri tout manman nan mwa d-Me 1967. "Choublak ak Kamelya" te rezilta pwenmye konkou sou pwezi kreyòl an Ayiti.

Emisyon Solèy dire soti 18 desanm 1965 rive 6 avril 1969, ak arestasyon Banbou, Mapou, Legba, Grenn Pwonmennen, Ti Nèg, Dyo Alèlè, Opon, Frannz Sili, Pastè Ivann... Twa dènye yo ak twa lòt ankò pa te manm Mouvman Kreyòl.  Ilsètarive  yo te nan lantouraj radyo-a, lò Rene Brenevil (Gwo Rene), Chèf Ploton makout-la t-ap pase mennòt, mare ke chemiz jenn gason, gwo Dimanch Pak 6 avril, san di pouki, lage yo nan depotwa Fò Dimanch. Gen ki pase yon jou. Gen ki pase 6 mwa tou.

Apre Emisyon Solèy-la ki te pòt-vwa Mouvman Kreyòl ayisyen-an, nou te jwenn Sosyete Koukouy, Isi Jenès, Koral Koukouy, Teyat Koukouy. Men sa Elimèd Togiram rapote sou kreyasyon Sosyete Koukouy-la, nan jounal "Le Petit Samedi Soir", nimewo 323.

JAN MAPOU
Rosedale, Queens, N.Y.